ಬೇಲಿ

ಭಾರತ ಮತ್ತು ಪಾಕಿಸ್ತಾನದ ಮಧ್ಯದಲ್ಲಿರುವ ಬೇಲಿ. ಎಡಗಡೆ ಪಾಕಿಸ್ತಾನ, ಬಲಗಡೆ ಭಾರತ

ಬೇಲಿ ಹಾಕಿರುವೆವು ನಾವು

ಒಂದೇ ನೆಲದ ನಡುವೆ

ಆ ಕಡೆ ನಿನಗೆ, ಈ ಕಡೆ ನನಗೆ

ದಟ್ಟ ಕಾವಲಿನ ನಡುವೆ

ಮರೆತು ಹೋಗಿರುವೆವು ನಾವು

ಒಂದೇ ತಾಯಿಯ ಮಕ್ಕಳೆಂದು

ಒಂದೇ ಮನೆಯ ಒಡೆದಿರುವೆವು

ಬೇಲಿ ಹಾಕಿರುವೆವು ನಾವು

ದ್ವೇಷ ಭಾವಗಳ ಜೊತೆಗೆ

ರಕ್ತ ಪಾತದ ನಡುವೆ

ಮೂಕ ಸಾಕ್ಷಿಯಾಗಿ

ನಿಂತಿಹುದು ಈ ಮುಳ್ಳಿನ ಬೇಲಿ

ಅಣ್ಣ ತಮ್ಮಂದಿರನ್ನು,

ಅಕ್ಕ ತಂಗಿಯರನ್ನು

ಬೇರ್ಪಡಿಸಿಹುದು

ಈ ಕಬ್ಬಿಣದ ತಂತಿಯ ಬೇಲಿ

ನಾವೇಕೆ ಹೀಗೆ?

ಎಂದೆಂದಿಗೂ ಹೀಗೇ ಬಾಳಬೇಕೆ?

ಅಸೂಯೆಯ ನೆರಳಿನಲ್ಲಿ

ಧರ್ಮ ಜಾತಿಯ ಒಡಕಿನಲ್ಲಿ

ಇಬ್ಬರ ರಕ್ತ ಕೆಂಪು ಅಲ್ಲವೇ?

ಇಬ್ಬರೂ ನಿಂತಿರುವುದೂ

ಒಂದೇ ನೆಲದ ಮೇಲಲ್ಲವೇ?

ಆದರೂ ಮಧ್ಯದಲ್ಲಿದೆ ಚುಚ್ಚುವ ಬೇಲಿ

ಮರೆಯೋಣ ಈ ದ್ವೇಷವ

ಹಂಚೋಣ ಸಹೋದರ ಭಾವವ

ಬೇಕಿಲ್ಲ ನಮಗೆ ಈ ರಕ್ತಪಾತ

ಒಂದಾಗಿ ಬಾಳೋಣ, ಚಿರಕಾಲ ಮೆರೆಯೋಣ.