ಚಳಿಗಾಲದ ಸಂಭ್ರಮದಲ್ಲಿ....

ಅಬ್ಬಬ್ಬಾ... ಅಂತೂ ಇಂತೂ ಚಳಿಗಾಲ ಪ್ರಾರಂಭ ಆಯ್ತಪ್ಪಾ.... ಎಲ್ಲಿ ಅಂತ ಕೇಳ್ತಾಇದ್ದೀರಾ... ಇಲ್ಲೇ ಸ್ವಾಮೀ.. ನಾನು ದೆಲ್ಲಿಯಲ್ಲಿ ಸದ್ಯಕ್ಕೆ ಝಂಡಾ ಉರಿರೋದ್ರಿಂದ ದೆಲ್ಲಿ ಚಳಿ ಬಗ್ಗೆನೇ ಬರಿತಾ ಇದ್ದೇನೆ...

ನಾನು ಇಲ್ಲಿಗೆ ಬಂದು ಒಂದುವರೆ ವರ್ಷ ಆಯ್ತು... ಎರಡು ಬೇಸಗೆ, ಎರಡು ಚಳಿಗಾಲನ ಕಳೆದದ್ದೂ ಆಯ್ತು... ಎನೇ ಹೇಳಿ ಇಲ್ಲಿನ ಚಳಿಯ ಖುಶಿನೇ ಬೇರೆ... ಎರಡೆರಡು ಶರ್ಟು, ಸ್ವೆಟರ್, ಜಾಕೆಟ್ ಇಷ್ಟನ್ನೂ ಹೊದ್ದುಕೊಂಡು ಮುಸುಕು ಹಾಕಿಕೊಂಡು ಮಲಗಿಕೊಂಡಾಗ ಸಿಗೋ ಖುಶಿನೇ ಬೇರೆ.... ಸ್ವರ್ಗಕ್ಕೆ ಮೂರೇ ಗೇಣು ಅಂತಾರಲ್ಲ ಅಷ್ಟು...

ದೆಲ್ಲಿಯಲ್ಲಿ ಚಳಿಗಾಲ ಶುರು ಆಗುತ್ತಿದ್ದಂತೆಯೆ ಜನಜೀವನದ ವ್ಯವಸ್ಥೆಯೇ ಬದಲಾಗುತ್ತದೆ... ಬೆಳಗ್ಗೆ 10 ಗಂಟೆ ಅದ್ರೂ ಸೂರ್ಯ ದೇವನ ದರ್ಶನ ಭಾಗ್ಯ ಲಭ್ಯವಾಗುವುದಿಲ್ಲ... ಸದಾ ಮಂಜು ಮುಸುಕಿಕೊಂಡೀರುವ ವಾತಾವರಣ... ಮಯ್ಯೆಲ್ಲ ಕಂಬಳಿ, ಸ್ವೆಟರ್ ಹೊದ್ದುಕೊಂಡು ಕೆಲಸಕ್ಕೆ ಹೋಗುವ ಜನ... ದಾರಿಯೇ ಕಾಣದಷ್ಟು ಮಂಜು... ಒಂಥರಾ ಮಜಾ ಇರುತ್ತೆ...

ನಾನು ನೈಟ್ ಡ್ಯೂಟಿ ಮುಗಿಸಿ ಮನೆಗೆ ಬರುತ್ತಿದ್ದಂತೆಯೇ ಒಂದು ಕಪ್ ಟೀ ಮಾಡಿಕೊಂಡು ಬಾಲ್ಕನಿಯಲ್ಲಿ ಕೂತುಬಿಡುತ್ತೇನೆ.. (ಬಿಸಿ ಬಿಸಿ ಟೀ ಕುಡಿದ ಹಾಗೂ ಆಯ್ತು, ಬಿಸಿಲಿಗೆ ಮೈ ಕಾಯಿಸಿಕೊಂಡ ಹಾಗೂ ಆಯ್ತು).. ಈ ರೀತಿ ಕೂತಾಗ ನನ್ನ ಮನೆ ನೆನಪಾಗುತ್ತದೆ.. ಯಾಕೆಂದರೆ ನನ್ನ ಮನೆ ಇರುವುದು ಹಳ್ಳಿಯಲ್ಲಿ.. ಆಗ ಇನ್ನೂ ನಮ್ಮ ಮನೆಗೆ ಸೋಲಾರ್ ವಾಟರ್ ಹೀಟರ್ ಬಂದಿರಲಿಲ್ಲ... ಹಾಗಾಗಿ ಬೆಳಗ್ಗೆ ಅಪ್ಪ ಎದ್ದವರೇ ಬಚ್ಚಲು ಮನೆ ನೀರು ಕಾಯಿಸಲು ಒಲೆ ಹಚ್ಚುತ್ತಿದ್ದರು.. ನಾನೋ ಅಮ್ಮ ನಾಲ್ಕು ಸಲ ಎಬ್ಬಿಸಿದ ಮೇಲೆ ಎದ್ದು ಆ ಒಲೆಯ ಮುಂದೆ ಹೋಗಿ ಚಳಿ ಕಾಯಿಸುತ್ತಾ ಕೂರುತ್ತಿದ್ದೆ.. ಈ ಕಡೆ ಒಲೆ ಉರಿ ಕೂಡಾ ತಾಗಬಾರದು, ಸ್ವಲ್ಪ ಶಾಖ ಮಾತ್ರ ಮೈಗೆ ತಾಗಬೇಕು ಆ ಥರ.. ಇಲ್ಲಿ ನಾನು ಬಾಲ್ಕನಿಯಲ್ಲಿ ಕುಳಿತಾಗ ಅದೇ ನೆನಪಾಗುತ್ತದೆ..

ಈ ವರ್ಷ ಕಳೆದ ವರ್ಷದಷ್ಟು ಚಳಿ ಇಲ್ಲ... (ಚಳಿ ಶುರು ಆಗಿ ಇನ್ನೂ ಎರಡು ದಿನ ಆಗಿದೆ ಅಷ್ಟೆ..) ಹಾಗಾಗಿ ಮುಂದಿನ ದಿನಗಳಲ್ಲಿ ಇನ್ನೂ ಚಳಿ ಬರಬಹುದು ಎಂದು ಆಶಿಸುತ್ತೇನೆ...

ಸರಿಯಪ್ಪಾ.. ಚಳಿಕಾಸಿದ್ದು ಆಯ್ತು.. ಇನ್ನು ಹೋಗಿ ಗುಬ್ಬಿ ಮರಿ ಥರ ಬೆಚ್ಚಗೆ ಮಲ್ಕೋಬೇಕು.. ಎದ್ದಮೇಲೆ ಇನ್ನೊಂದು ಬ್ಲಾಗ್ ಜೊತೆ ಸಿಗ್ತೀನಿ....